|
||||
| Левица ќе ја поддржи Сиљановска во вториот круг |
 Левица ќе ја поддржи Сиљановска во вториот кругПрезидиумот на Левица на синоќешната вонредна седница одлучи да ја поддржи професорката Гордана Сиљановска-Давкова како кандидат за претседател на државата.
„Сиљановска ја сметаме за атипичен претседателски кандидат. И покрај нашите несогласувања по одредени прашања, знаеме дека таа е изградена личност со неспорен кредибилитет, којашто ефикасно ќе се спротивстави на политиката на коалиционата двојка СДСМ-ДУИ, личност која ќе се води по принципите на правото, правдата и етиката и нема да дозволи компромитација на својот интегритет“, велат од Левица. Од таму додаваат дека нивната поддршка за Сиљановска да стане првата жена претседател на Републиката е строго персонална, а никако провмровска. Дотолку повеќе што, велат од таму, повмровски кандидат во случајов е токму Стево Пендаровски, кој беше портпарол во првата вмровска влада на Љубчо Георгиевски, а потоа и советник во кабинетот на Борис Трајковски. „Нашата соработка со професорката датира уште од времето на Професорскиот пленум, па оттука оваа наша поддршка ја сметаме за принципиелна и критична. Секој гласач на проф. Сиљановска мора да ја држи за збор, будно да го следи секој нејзин чекор и да ѝпомогне да не потпадне под влијанието на големите партии СДСМ – ДУИ – ДПМНЕ. Нам сега ни треба реализирана и принципиелна личност за претседател, која нема да биде обична марионета, туку мудро ќе ги користи своите уставни овластувања со цел да не дозволи тотална власт на само една партија“, велат од Левица. Од партијата велат дека колку и да се чини оправдан гневот против корумпирани елити, сепак на овие избори – каде бираме личност, а не партија – бојкотирањето ќе биде само во корист на властодршците и ќе овозможи актуелниот собраниски спикер да биде в.д. претседател. „Груевизмот, како стадиум на изедначување на партијата со државата, е на раб да се повтори во заевизам – како автократски модел на владеење. Наша задача, како автентична левичарска партија, е да застанеме на патот на оваа забегана влада во нејзините намери да го доуништат и онака климавиот суверенитет на Републиката и да ја престорат во слуга на империјалните интереси“, порачаа од Левица. |
