Македонските безбедносни служби од своето формирање по Втората светска војна па до целосното осамостојување на Македонија во деведесетитите години, речиси скоро пет децении беа составен дел од единствениот безбедносен систем на Југославија. Во една таква констелација на единствен безбедносен и одбранбен систем на Југославија, македонските безбедносни служби беа во потполна зависност на Сојузните безбедносни служби, односно беа ставени во потчинета положба, а со тоа и послушен апарат за спроведување на политиката на  „Сојузниот безбедносен апарат“. Во овој период на партиското едноумие, кога „Центарот“ во Белград ја креираше кадровската политика на македонските безбедносни служби, долг период на чело на службите беа поставувани лица кои не се отука и лица кои во името на на зачувување на братството и единството на југословенските народи, а зад која вешто се криеше српската хегемонистичка политика, немаа слух за македонските национални интереси.

ИНТРИГИ НА УДБА

Главниот инспектор В.Д. на Службата за државна безбедност на Републичкиот секретаријат за внатрешни работи на СР Македонија (СДБ - II- сектор на  РСВР-СРМ), на 3.03.1987 година ќе изработи:

„Предлог за пласирање на информација во МНЕ и пошироко“, класифицирана како „Строго доверливо“  во која се вели:

„Во врска со најновите активности на Драган Богдановски, имаме намера преку Мане Јаковлевски, кој наскоро треба да патува во Западен Берлин, каде што подолго време ќе престојува, истите да ги пласираме со цел да го разобличиме како човек кој е доста превртлив, посебно во неговата национална определба.

Меѓутоа, за да постигнеме целосен ефект, неопходно е Јаковлевски да го увериме во ваквата национална превртливост на Богдановски, а тоа, предлагам да го направиме на оледниот начин:

- Да го запознаеме М.Јаковлевски со новооткриените написи и платформа на Д.Богдановски;

Од „ Предлог за пласирање на информација во МНЕ и пошироко“ кој е одобрен од надлежните, може да се види дека Службата за државна безбедност, планира како тројански коњ да го искористи Мане Јаковлевски, брат на Гојко Јаковлевски, и преку него да се пласираат информации кои би ја дескредитирале личноста на Драган Богдановски, како превртлива личност а со тоа и да ја изгуби неограничената доверба и подршка која ја има Гојко за Богдановски, а  преку него и од емигрантските организации во Европа.