Томе Велков

НА МАКЕДОНСКИОТ ПОЛУОСТРОВ НИШТО НОВО

на македонскиот полуостров сè е по старо

и понатаму надежта е закована на крст

и понатаму кариери и докторати

на брчките на овој народ

предавници како бесни кучиња

пустошат и лаат

глуви се ѕвездите седнати на трпезата

готови за нов пир

сега веќе ништо не нè сопира

во овој милениум да пресудиме

од предавниците да се ампутираме

зашто и оваа година имаше војна

на македонскиот полуостров

ни остана само осакатената љубов

со јанѕа за тромеѓата да жалиме

со ѓаволот не можеме во рајот

колку нови премрежиња премреживме

и сè така срамот си го носиме.