Свети Трифун се слави на 14 февруари, именден слават Трифун и Трифе.

Во Зубовце на овој ден во 10.00 часот се оди во лозје кај крстот каде што свештеникот кажува молитва и осветува вода, а во 11.00 часот во Црквата „Света Огнена Марија“, се кршат две погачи а во секоја има паричка.

Кај кого ќе паднат паричките тие ќе бидат кумови за наредна година.

Веќе традиционално еден од кумовите да биде жител на Зубовце а еден од гостите.

Од памтивек во Зубовце св. Трифун го прославуваат на 14 февруари како заштитникот на виновата лоза и на овошките. По традиција, се излегувало на лозјените насади и со молитва се закројувале неколку прачки.

Карактеристично за закројувањето на зубовските лози е тоа што, во минатото додека оделе да ги закројуваат виновите лози, со себе секој си носел ракија, домашно вино, пржени Зубовски колбаси со сушени пиперки и јајца. Откако ќе ги закроеле лозјата секој во своето лозје јадел, а потоа се собирале во групи и продолжувале со пиење.

Зубовчани редовно знаеле да се напијат “машки“ за овој празник.

Оваа вековна традиција во Зубовце продолжува и денес да се слави. Зубовчани нема да дозволат оваа долговековна традиција да згасне.

Витко Огњаноски, Зубовце