ВМРО-ДПМНЕ: Лицемерно е СДСМ да повикува на конструктивнос

„Крајно лицемерно и смешно е токму пратениците од СДСМ да повикуваат на конструктивност и почитување на правила, принципи и Деловник за работа на Собранието на Република Македонија. Граѓаните знаат дека СДСМ и нејзините пратеници во многу наврати досега оневозможуваа нормално функционирање на Собранието, се обидуваа да блокираат донесување на голем број на позитивни законски решенија, поднесуваа илјадници неаргументирани и смешни амандмани, навредуваа, уништуваа собраниски инвентар, бојкотираа, не доаѓаа на работа и уште многу други недолични и несвојствени работи за една пратеничка група“, се наведува во соопштението на ВМРО-ДПМНЕ.

За разлика од нив, како што се додава, пратениците од пратеничката група на ВМРО-ДПМНЕ како и секогаш, ќе ги почитуваат Уставот, законите и парламентарната пракса, но ќе се борат и ќе се спротивстават на, како што велат, „измамата која СДСМ ја направи со прифаќањето на тиранската платформа и во ниту еден случај нема да престанеме да се бориме за заштита на државните и националните интереси на Република Македонија“.

Според ВМРО-ДПМНЕ, најдобро за Република Македонија, за нејзините граѓани и за нејзината иднина ќе биде СДСМ и нејзините пратеници да ја разберат пораката на граѓаните од последните избори и да си ја прифатат улогата на губитник на изборите без разлика колку и да им е убаво кога од ДУИ им велат дека се победници.