Како што налага вековната народна и црковна традиција, и годинава во Зубовце свечено се одржа обредот на одврзување на крстовите по повод големиот христијански празник Водици. Овој значаен настан, кој со децении се пренесува од генерација на генерација, повторно го обедини селото околу верата, заедништвото и македонскиот духовен идентитет.

Со благослов на Македонската православна црква, стариот и новиот кум со котлето и светиот крст го обиколија селото, посетувајќи ја секоја куќа и секое маало, носејќи молитва за здравје, среќа и бериќет.

Зубовце, поделено на 10 маала, и годинава ја покажа својата силна организација – во водичарските обичаи беа вклучени десет групи, кои со посветеност ја одржуваат оваа света традиција жива.

Водици во Зубовце не е само верски празник, туку и симбол на истрајноста и непокорот на македонскиот народ. Во време на предизвици и заборавање, ваквите обичаи се жив доказ дека корените не се губат, туку се зацврстуваат преку верата и народното паметење.

Со одврзувањето на крстовите, Зубовце уште еднаш покажа дека традицијата не е минато, туку жива сила што го чува идентитетот и го поврзува народот.

Овој обичај останува свет аманет за идните поколенија и горд белег на македонската духовност.

Бог се јави!

Навистина се јави!