МАКЕДОНСКА ЗАЕДНИЦА ВО ХРВАТСКА

14 јуни 2016 година, Загреб, Хрватска

- Минатата недела, на 9 јуни 2016 година, во Загреб, Заедницата на Македонците во Република Хрватска (ЗМРХ) го промовираше jубилејниот стоти број на своето списание "Македонски глас“. Списанието континуирано се печати од 1993 година.

Програмата ја водеше Елизабета Петровска, заменичка на главната уредничка на "Македонски глас“ и секретар на Заедницата на Македонците во Република Хрватска. Во улога на промотори се јавија д-р Никола Гроздановски - првиот и почесен претседател на ЗМРХ, Огнен Бојаџиски - првиот главен и одговорен уредник на списанието, Илија Христодулов - претседателот на ЗМРХ и Милена Георгиевска - главната и одговорна уредничка на списанието на македонската национална заедница во Хрватска "Македонски глас“.

Промоцијата беше збогатена со музички дел, каде што настапи пејачката група "Моми бисерни" којашто делува при МКД "Охридски бисер" од Загреб. Под диригентство на водителот Сафиудин Алимоски, тие испеаја неколку македонски песни, а Ѓулијана Алимоски ги придружуваше на флејта.

Својата поддршка на Заедницата на Македонците во Хрватска ја изрази и Колинда Грабар - Китаровиќ, претседателката на Република Хрватска, која испрати поздравно писмо со честитки.

За време на промоцијата им' се одаде почит и благодарност на главните уредници, новинари и дописници, кои се заслужни за формирањето и развојот на ова списание.

На промоцијата присуствуваа и голем број Македонци од Загреб и нивни пријатели. Меѓу нив беше и Maчеј Качоровски - советник во Амбасадата на Република Македонија во Република Хрватска, Ангел Митревски - член на Советот за националните малцинства на Република Хрватска, Диана Машала Перковиќ од Хрватската матица на иселенците, протојереј Кирко Велински - свештеник на Македонската Православна Црква во Хрватска, Томе Апостолоски - претседател на Советот на македонското национално малцинство за Град Загреб, Мирјана Mајиќ - претседателка на МКД "Билјана“ од Задар, Благој Штерјов - претседател на МКД "Охридски бисер“ од Загреб, Ивона Дуноски Митев - претставничка на македонското национално малцинство за Приморско-горанската жупанија, Ненад Јовановиќ - претседател на новинарите за националните малцинства при ХНД (Хрватско новинарско друштво) и многу други.

Промоцијата беше проследена со видео проекција на фотографии од списанието "Македонски глас“. Покровител на промоцијата беше Советот за националните малцинства на Република Хрватска.

Светски Македонски Конгрес