МАКЕДОНСКА ЗАЕДНИЦА ВО ВИКТОРИЈА

20 ноември 2016 година, Мелбурн, Викторија - Во организација на Македонската Австралиска Заедница, денес, во Паркот на општина Вит’лси, се одржа традиционалниот Петти Македонски Фестивал во храна.

Македонскиот Фестивал во храна годинава го посетија повеќе од десет илјади Македонци и Австралијци. На Фестивалот беа поставени повеќе штандови со понуда на јадења од богатата македонска кујна и забава со настап на повеќе културно-уметнички друштва и играорни групи со македонски песни и ора, меѓу кои и младите играорци од Австралиско Македонскиот играорен ансамбал ТОШЕ.

Специјални гости на Фестивалот беа македонскиот амбасадор од Канбера Веле Трпевски, генералниот конзул од Мелбурн Елизабета Коруноска и претседателот на Светскиот Македонски Конгрес Тодор Петров.

- Честитки до организаторите и поздрав до Македонците на Петтиот Македонски фестивал на храна во Мелбурн. Продолжете ги традициите и обичаите од Македонија, фестивалот е манифестација заслужна за вашето дружење, нека е вековит и догодина повеќе и повторно заедно, - рече амбасадорот Веле Трпевски.

- Се надеваме дека оваа традиција ќе продолжи, Австралиско Македонската Заедница заслужува пофалби, потврдивте дека сте достојни Македонци во одбрана на културата, - рече генералниот конзул Бети Коруноска.

- Светскиот Македонски Конгрес апелира до сите Македонци во Австралија: На семакедонско помирување и обединување за одбрана на името на државата и идентитетот на нацијата, затоа што силата е во единството! Во согласност со Законот на Австралија, јавно соопштувам, дека од денес почнуваме со собирање на потписи за петиција до Федералниот Парламент на Австралија, да и’ препорача на Австралиската Влада веднаш и безусловно да ја признае Републиката со нејзиното единствено име коешто се состои од еден и единствен збор - зборот Македонија! - рече претседателот на Светскиот Македонски Конгрес.

Организаторите, амбасадорот, генералниот конзул и претседателот на Светскиот Македонски заедно го прекршија славскиот колач.