На 10-ти ноември во Македонската библиотека на Литературното друштво „Григор Прличев“ се одржа поетски опус и промоција на книги од поетесата и писателка Оливера Јовановска од Мелбурн.

Промоцијата на книгите ги направи поетот и писател Иван Трпоски, а бројни стихови од книгите читаше покрај авторката Оливера така и поетесата Марија Александрова. Промоторот Трпоски го опиша богатиот поетски опус на Оливера која за само неколку години пред јавноста се појави со пет збирки поезија и еден роман преведен на три јазици, а исто со поезија и раскази е застапена во неколку антологии и зборници во Македонија. Нејзина поезија и проза е наградувана на повеќе конкурси во Австралија и Македонија, меѓу кои и први награди за поезија на конкурсите „Мајка Тереза“ и „Сплоти се Македонијо“. Оваа година е прогласена за Поет на годината од Фондацијата Такец од Битола. Доделена и е Цветинова награда за мир и прогласена за Амбасадор на мирот.  Важно е да се забележи дека некои од нејзините песни се изведувани од познати македонски интерпретатори.

Инаку Оливера Јовановска е родена во 1970 година во Битола. Од 1986 година живее и работи во Мелбурн, каде се здобива со диплома за администрација и бизнис менаџмент, кој се главен фактор за нејзино успешно менаџирање бизнис за здрава храна. Оливера пројавува љубов кон пишаниот збор уште од најмлади години. Автор е на збирките поезија „Неостварена љубов” (2020), „Магични љубовни зборови” (2021), „Одмрзнати чувства” (2022), „Слушни го срцето” и „Време безвремено” (2023), како и збирката раскази „Талкање низ соништата” (2023). Автор е на романот „Лавиринт на Вистината” (2021) кој е преведен на англиски и албански јазик (2022), како и на руски јазик (2023). За овој творечки опус, Литературното друштво „Григор Прличев“ како издавач на нејзините книги и додели на Оливера диплома за нај издавен автор на Друштвото за последните три години.

Оливера член во МЛД „Григор Прличев” од Сиднеј и на МЛД „Кочо Рацин“ од Мелбурн, како и на Фондацијата Такец од Битола.

Душан Ристевски-Македон