На 4-ти мај 2024 година, на Велика Сабота, во организација на Црковната Општина „Св. Петка“ во Рогдаел, предградие на Сиднеј, се одржа панахида за војводата Гоце Делчев но и за сите војводи, комити, партизани и борци кои ги дадоа животите за Македонија и делумно ослободување и формирање на Република Македонија. Панахидата ја одржа свештеникот Владо Недески.

Во почетокот се интонира македонската химна во изведба на Маја Наумовска, потоа општественикот Кирил Циревски прочита реферат за животот и делото на војводата Гоце Делчев. Потоа следеа рецитации на песни од поети посветени за легендарниот Гоце Делчев во изведба на Даниела Недеска, Кристина Санчевска и Александар Младеновски. Исто така со своја поезија посветена на Гоце Делчев настапија поети од Литературното друштво „Григор Прличев“: Иван Трпоски, Марија Александрова, Спасија Огненовска и Васил Тулевски.

Пред бистата на војводата Гоце Делчев беа положени венци и свежо цвеќе при што пристојно му се оддаде почит на војводата Делчев, од друштвата и организациите: Црковната Општина „Св. Петка“ (венец положи претседателот Борис Димчевски и Кире Марковски), КУД „Илинден“ од Рогдаел (Роберт Наумовски), Македонското пензионерско друштво од Рогдаел (Спасија Огненовска), Литературното друштво „Григор Прличев“ (Иван Трпоски, Марија Александрова, Спасија Огненовска, Др Васил Тулевски и Тоде Мицковски).

Поздравна реч исто така даде и градоначалникот на Општината Bayside, госп. Бил Сарафиновски кој е од македонско потекло и кој повеќе пати беше избран за градоначалник на Општината Рогдаел, град  збратимен со Битола.

Иван Трпоски