Повод, крвавиот чин што се случил

на 6 јануари 1916 година во месноста „Дервишка Нива“

(во близината на превојот Барбарас)

од бугарската окупаторска војска -

Побрзо од разумот

стигнав на ова злодобно место

за да допрам до здрав разум

пред безумниот непријател - окупатор

бидејќи тој

сè уште не престанува да сее

неправди врз мојата татковина

Еве нè повторно се соочуваме

со огништето на бугарскиот фашизам

тој не догорува пред вистината

туку повторно ненаситно се храни

и со коските на мртвите на минатото

но невозможно е да ги проголта

грлото на нивниот национализам

Овдека пред овој напис

не самува, не чмаи, не молчи

македонската историја

таа сè уште е во неумерен поход

по Балканот и по светот

со биднината да се справи 

пред свршен чин

На овој ден и Господ нас нѐ слуша

ние сме вашите потомци

вашите имиња живеат

во нашиот живот

а рацете на душманот не се посилни

од нашата љубов и почит спрема вас

секоја година на овој кобен датум

ќе ви одаваме почит

ќе ве спомнуваме

затоа што сме вистински Поречани

ние не порекнуваме,

ние не забораваме.

 САВО КОСТАДИНОВСКИ