Крум Зографов (1884 – 4.V.1922) е македонски револуционер, член на Македонската револуционерна организација и на Македонската федеративна организација. Во декември 1912 година Зографов учествувал на средбата на македонските дејци во Велес, организирана од Димитар Чуповски, на која било решено да се испратат претставници на конференцијата во Лондон, како и во Париз за да се борат за зачувување на целовитоста на Македонија.

Крум Нацев Зографов е роден во 1884 година во Велес. Завршил трето одделение. По професија бил часовничар. Во 1903 година учествувал во Илинденското востание а по востанието во 1904 година бил на чело на Велешкиот окружен револуционерен комитет на Македонската револуционерна организација. Од 1907 година бил четник на Иван Наумов Аљабакот и учествувал во битката на врвот Ножот.

Во Првата балканската војна (8.X.1912 – 30.V.1913), Зографов учествувал како командант на партизанска чета на Македонско-одринското ополчение. Во декември 1912 година зел учество на средбата на македонските дејци во Велес, организирана од Димитар Чуповски, на која било решено да се испратат претставници на конференцијата во Лондон, како и во Париз за да се борат за зачувување на целовитоста на Македонија.

Зографов потоа учествувал на страната на бугарската армија во Втората балканска војна (29.VI.1913 – 10.VIII.1913) и во Првата светска војна (28.VI.1914 – 11.IX.1918).

По завршувањето на Првата светска војна тој бил меѓу противниците на Тодор Александров и во 1920 година бил избран за раководство на Илинденската организација, а во 1921 година влегува во ЦК на Македонската федеративна организација.

На почетокот на 1922 година учествува на помирувачки состанок во Тирана со членот на ЦК на ВМРО Александар Протогеров. Федералистите Филип Атанасов, Павел Христов, А. Василев, Христо Цветков и Крум Зографов стапиле во контакт со Александар Протогеров, за да воспостават примирје и соработка помеѓу федералистите и автономистите како и привлекување на албанските револуционери кон македонското револуционерно движење

По одбивањето на Тодор Александров да го прифати помирувањето потпишано од Протогеров, Зографов со чета од 50 луѓе, влегол во Источна Македонија, со цел да ја преземе контролата врз структурите на ВМРО. Меѓутоа, четата на Зографов била предадена на српските власти, а во престрелката што следела, самиот Зографов бил убиен кај селото Кошево.

подготвил: Т.К.