М-р Мартин ТРЕНЕВСКИ, Поранешен министер и амбасадор

1. Владата што замина (во моментов кога го пишувам прилогов мандатарот за состав на нова влада Христијан Мицкоски веќе го презентира составот на новата влада на РМ) ќе остане запаметена по пустошот што го остави зад себе на политичко, економско, но и на сите други полиња, но не успеа да го уништи духот на народот којшто на изборите си го кажа своето! За мене особено интересна индивидуа за која сакам да напишам збор-два е лицето Бујар Османи - хирург по професија, кој функцијата министер за надворешни работи ја (зло)употреби за себепромоција, но и по тоа што сe застапуваше за интересите на некои наши соседи, наместо за интересите на земјата која го плаќаше - Република Македонија!

  Многу простор ќе ни треба да ја сумираме работата на овој млад, но нагласено етноцентричен интелектуалец кој етничкото (албанското) му беше во прв план, наместо државните интереси на земјата (РМ) што ја претставуваше. Тој нагласено вложуваше напори да  го промовира каде ќе стигне Косово, а не се либеше да презентира ставови спротивно на интересите на државата! Па како да му се заборави на Бујара дека наместо да ги следи ставовите шефицата (според Уставот) на македонската дипломатија - Претседателката на државата Проф. д-р Гордана Силјановска Давкова, тој отворено застана во одбрана на грчките ставови по прашањето на можнпоста приватно да се користи вековното име на државата и нацијата - Македонија и Македонци. Според него, демек Грчката страна била во право, и таа наводно ги исполнила својот дел од обврските од Преспанскиот договор кога го дигнала ветото за членство на Македонија во НАТО,  а таа  имала полно право кога реагирала на (не)примената на принципот "ерга омнес" (едно име и за по надвор и за домашна употреба), на што се обврзала според капитулантскиот Договор од Преспа. Ви се верува ли какво предавство на национаалните интереси на Македонија стори ексминистерот Османи!?

  Лицето Бујар Османи ги погази пред заминување и правилата за неименување на дипломати во преодниот период до именување на новата влада со тоа што потпиша решенија на петнаесетина дипломати во МНР за нивно распоредување во мисии во странство, на што следеа бројни реакции дека тоа не смее да го прави! Последниот "бисер" на Бујара се лекциите (!)  што јавно ги одржа на новата влада дека, според него, не смеело да се говори за "македонска дипломатија", туку за "дипломатија на Република Македонија"

  Не знам дали ваквите ставови потекнуваат од село Зајас,  од каде до сега беше изворот на  речиси сите политички ставови на Демократската партија за интеграција /ДУИ/, чиј потпретседател е Бујар Османи, или од друг центар /Мала Речица, на пример/, но мислам дека со новата констелација на власт во РМакдонија такви и слични  н е м а  да поминуваат!?

2. Националниот Парк "Шар планина" соопшти дека во иднина ќе наплаќа на секое моторно возило од 150 до 450 денари кое ќе го посетува паркот за да се намалело загадувањето со издувни гасови. Одлуката не важела за месното население, но нејасно е дали ќе важи за сопствениците на викендички, рекреативци и друг вид посетители на овој популарен националнниот парк.

   Оваа одлука е без преседан бидејќи дефинитивно негативно ќе се одрази на посетеноста на националниот парк Шара! 

  Имам посетено многу национални паркови од Австралија, ширум Скандинавија па се до Северна Америка но насекаде гледаш  настојувања националните паркови да се отвораат што е можно повеќе и да нудат привлечни содржини за посетителите. Нашата Шара од секогаш била магнет за посетители, особено зиме, но се повеќе има ентузијасти кои и во топлите месеци одат за да уживаат во прекрасните пеисажи. Но сега, по воведувањето на такса за возилото (за пешаци и велосипедисти не се наплаќало), тврдам дека бројот на посетители драстично ќе се намали.

  Наплатата на такса за возила во националниот парк Шар планина сметам дека е без преседан не само во Македонија (во Републиката имаме уште неколку национални паркови: НП Маврово, НП Галичица, НП Пелистер) и мислам дека е поупатно надлежните што донесле одлука за воведување на такса за возила, да се посветат на хигиената во паркот, за уредување на повеќе паркинг простор, а не да ги одбиваат посетителите до дополнителни издатоци за влез со моторно возило.

   На сакам да бидам скептик, но нешто од внатре ми говори дека во спорната мерка може да има и политичка димензија. Велам може. Но не исклучувам таква можност бидејки сонот за некакви вештачки територијални творби сеуште е присутен во главите кај некои наши сожители пред се од западниот дел на Републиката.