Чување и зацврснување на македонското единство и на нашето борбено единство  со грчкиот народ- 26 март 1949 година.

ЗАДАЧИТЕ НА НОФ

„... ДАГ е вооружената авангарда на народот, на грчкиот и на нашиот, која достојно ја брани нашата земја од дефинитивното поробување и катастрофа. Помасовното учество на нашиот народ во редовите на ДАГ и уште поголемата помош за неа, е основната задача на НОФ.

Нашето единство, македонското, како и понатаму борбеното единство со грчкиот народ, е неопходен предуслов за победата. Без нашето македонско единство и без понатаму борбено единство со грчкиот народ, ќе доживееме само катастрофи. Нашите непријатели го знаат тоа и затоа прават се што можат за да не расцепат. Но народот се има многу напатено од такви расцепи, тој има искуство и не се мами. Кој прави шу-шу со цел да го скрши нашето единство како Македонци, кој прави шу-шу-шу со цел да не раздели од борбениот грчки народ, од соборците...Тој работи во корист на непријателот и за нашата катастрофа. Целите на борбата на ДАГ, целите на ПДВ, целите на политичката линија на КПГ во врска со нашето македонско прашање се многу јасно формулирани во Резолуцијата на Вториот пленум на ЦК на КПГ.

Не треба да постои никакво сомневање дека како резултат на победата на ДАГ и на народната револуција, македонскиот народ ќе има свое полно востановување, такво какво што самиот сака, пролевајќи ја денес својата крв за да го извојува тоа. Тие се и нашите цели, целите на политиката на НОФ... Чувањето на македонското единство, чувањето и зацврстувањето на нашето борбено единство со грчкиот народ, чувањето на чистотата на политичката линија и нејзиното популаризирање е обврска на сите нас, на секој член на НОФ, на секој Македонец и секоја Македонка патриот...”

Извор:

ДАРМ, фонд: Егејска Македонија во НОБ 1945-1949, а/е 37/Б/49;